美式朱古力曲奇餅

韋太一向都好少整曲奇餅, 原因好簡單, 因為要花的時間或功夫可能比起整一個蛋糕還耐,而且好少將曲奇餅當"早餐"食嗎 !

所以, 家中都有好多材料都係買左整左一次就放左係到唔知要等到幾時先用得著,剛巧而家仔仔放暑假, 整左都可以給他們當下午茶點吃, 都值得一試 !

其實我都唔鐘意食美式曲奇, 有一次朋友請我食了一塊 "Mr. Field "的曲奇餅,她話好好食, 但我食左少少想掉又怕浪費, 都係講聲多謝, 下次唔好客氣啦 !

但今次點解我又再試整, 原因見到d網友話好想試整, 但又唔成功 lor.. 所以我都要再試... 

大家看看兩張相有乜唔同先啦 ?　

* 食譜參考網上不同網友及自行改寫左少少供參考 *

 

美式朱古力曲奇

材料：(約16- 20塊)
A)  麵粉  170g  + 可可粉 30g   //  鹽少許
B)  牛油 100 g   + 黃砂糖 (或黑糖)  80g //  雲呢拿香油  適量
C)  蛋1隻
D)  朱古力粒  80g  /  什果仁或杏仁  隨意 (但要預先烘脆)

做法：
1. 將A)的材料預先過篩, 然後將鹽加入
2. 牛油室溫放軟, 然後將黃砂糖加入打勻後, 將蛋漿分3-4次加入拌  勻.
3. 將1)的粉類加入2)內, 並且將D)料加入拌勻.
4. 取約1湯匙麵團搓圓後, 放在巳墊牛油紙的焗盤上.
5. 放入已預熱至180度的焗爐, 焗約12-13分鐘, 出爐放涼5-10分鐘才可試食.

注 :
1. 由於每個焗爐的溫度都有徧差, 所以請自行調較爐溫和出爐的時間.
   建議在第一次焗製此食譜時, 如時間許可, 可以先放兩塊入去試焗 及調至合適的爐溫.
2. 美式曲奇與英式的曲奇不同之處在於美式係焗完食落口感係淋身而表面不會焗至金黃色的, 英式就係要焗至金黃色及脆身的.