2010 年 - 美心臘味 [簡易煮食、好味有新意] - 韋太創意食譜 (1) - 簡易生炒糯米飯

早前韋太收到美心產品部的同事與韋太聯絡。她們話想送贈美心臘味產品給韋太試食及希望韋太有興趣去用這些產品創作一些簡單而又有創意的食譜。
韋太一向對於創作煮食當然有興趣啦 …
雖然韋太唔係成日要入廚，但係得閒煮幾味都絕對無問題的。
所以，韋太今個星期一連數天韋太會不停供應由韋太親自創作及烹調的簡易菜色及食譜提供給大家，希望大家在這秋冬的季節盡情享用臘味之餘，又唔怕食得唔健康  !
有興趣的朋友，歡迎入去參觀及指教一下 !

不如先給大家看看美心的臘味產品包裝先啦 ! 每款都有不同顏色的精美包裝 !

唔講大家唔知，韋太、韋大少及二少都非常之鐘意在冬天吃生炒糯米飯架。
所以，韋太今次的介紹，其實早巳在韋太的網誌內都出現過。不過，今次就係用左美心的鴛鴦鮮肉臘腸去做，效果更加突出臘味的鮮味 !
***********************************
食譜名稱 : 簡易生炒糯米飯

產品推介 : 美心鴛鴦鮮肉臘腸
材料 :　
白糯米　 600 克 (1斤)
美心鴛鴦鮮肉臘腸   每款2條
蝦米     1 湯匙
蔥粒     1湯匙
冬菇     3 粒
調味料:
老抽      3 湯匙
生抽      1 湯匙
雞粉      1茶匙


做法 :
1.白糯米用清水浸 4小時，然後沖洗乾淨後瀝乾水份備用。
2.冬菇用清水浸軟，去蒂後渣乾水份後切粒。
3.蝦米浸軟後切粒。
4.臘腸切粒備用。
5.糯米浸好後，加半茶匙鹽拌勻。在蒸籠上加一塊白布，然後將糯米放入，蓋上籠蓋蒸約20分鐘。 (約10分鐘後可以加入2-3湯匙熱水在糯米上，蒸出來效果會更好) 蒸好後放涼。
6.燒熱鑊落少許油，將臘腸、蝦米先爆炒一會，然後加入冬菇炒一會後盛起。
7.燒熱鑊落2湯匙油，先將糯米飯放入鑊炒片刻炒散，然後加入巳爆炒的臘味材料及調味料炒勻後即可上碟。
以下圖片供參考 :






韋太小貼士 :
白糯米預先用水浸 4小時巳經吸了大量水份，所以放在白布上蒸時不用加水都可以蒸熟，蒸出來的效果就像一粒粒的白飯，只要加入適當的調味料再去炒勻，效果都非常之理想。
如無白布，可以用煲湯袋剪開去代替，或可試加一張巳掃油的牛油紙或微波爐保鮮紙都可以。另外，無蒸籠都可以用鑊加布去蒸都一樣架 !

 大家快啲用呢個方法去試下啦 !