2015年5月31日 星期日

我家私房菜 - 簡體網站


http://column.etnet.com.cn/column-list-EtnetcolB114

酸齋

昨天終於買左一包麵筋回來, 不本諗住叫工人整,

但今天都無出街, 所以成日都對住部電腦超過8小時. (好肉返左工)

今晚好簡單整左幾樣送, 有燒肉、無油的烚菜心、煎芝華士腸仔 及這味酸齋.

** 內附食譜 * *

酸齋

材料: 麵筋  半斤

汁料  : (汁料的份量可隨各人喜好而  + / 一)
茄汁  3湯匙  +  糖  2湯匙,    +  白醋  1 湯匙, 
粟粉  1茶匙  +  水  4-5 湯匙  +  鹽  1/5茶匙 
檸檬汁  1/2茶匙 (可以唔用)

做 法:
1. 齋筋用熱水沖洗一下,然後將水份?乾備用.
2. 汁料預先拌勻備用.
3. 燒熱鑊, 放少許油 (或白鑊), 將麵筋加入炒至少許乾身. 然後將巳拌勻的汁料加入
   炒至汁料開始杰身後即成.

注 :
如汁料太杰, 可以加入適量水份去開稀, 調味可以再自行調較.

咖喱牛腩

咖喱牛腩

                       

咖喱牛腩

材料 :
牛坑腩  1斤  或  加  牛筋1斤
薯仔  1-2個  /  洋蔥 1個  / 紅蘿蔔  1/2個
薑茸、蒜茸 及 乾蔥茸 各 1茶匙

調味料:
A) 咖喱粉 2茶匙 (或 咖喱醬 2湯匙) + 鹽 1茶匙 + 冰糖  2 小粒 + 雞粉 1茶匙
B) 椰漿 及 花奶  各4 湯匙

做法 :
1.先將牛腩汆水、洗淨, 然後連同6杯水一起放入鍋內將牛腩炆稔, 待涼切件及瀝乾水份備用.(牛腩水留起2杯備用)
2.洋蔥、薯仔及紅蘿蔔去皮切角形狀備用.
3.燒熱鑊, 用1湯匙油先將薯仔爆炒一會, 然後盛起.
4.另再用1湯匙油將薑茸、蒜茸、乾蔥茸、洋蔥及紅蘿蔔一起爆炒後, 將咖喱粉及其他調味料A)加入炒勻.
5.將牛腩及2杯牛腩水加入, 用慢火煮約30分鐘後熄火, 最後將調味料B)加入炒勻即可.

鎮江醋陳皮雞翼 (附食譜)

第一次用鎮江醋去煮雞翼, 因為之前唔知整乜就買左一枝鎮江醋回來,

為左唔好浪費呢枝好野, 見有食譜話用佢, 重唔那那聲去跟住試做啦 !

點知, 出書D人唔知係唔係"斷估" , 佢話一磅雞翼加1杯水去煮汁, 我巳經係買左兩磅雞翼煎香後才去煮, 點知趁煮就趁多水 (或者可能係兩磅雞翼出水更多), 所以到最後都要自己 (整色整水) 才有書中的顏色 .. (即呀蘇話整乜都要加D老抽去上色)

其實煮中菜同整蛋糕的原理係差唔多, 煮得多就唔使跟佢話加鹽加醋, 係要靠自己去試味的及要領略個中的所謂 "竅門 "就容易掌握啦 !

 

 

鎮江醋陳皮雞翼 材料: 急凍雞中翼  1-2 

調味料:

鎮江醋 2湯匙      砂糖  2 湯匙

喼汁   1湯匙      生抽  1 湯匙         少許

老抽   1湯匙      清水  1/4 1/2

乾蔥頭 2 (切片)  陳皮 1小角  (預先浸軟及刮乾淨瓤後切絲)

 

芡汁 : 粟粉 2茶匙 +  清水 1湯匙

 

做法:

1. 將雞翼解凍, 洗淨後瀝乾水份.

2. 燒熱鑊加入少許油, 將雞翼兩面煎香後盛起.

3. 另再燒熱鑊加入少許油, 將乾蔥片爆香後加入雞翼及調味料, 大火滾起一會後轉中細火將雞翼煮熟, 最後加入陳皮絲煮片刻, 用少計生粉水埋芡至適合的杰度, 上碟供食..

  

: 

1.      如汁太稀,可以加入少許生粉水去埋芡, 太杰可以加入少許 "熱水"去煮.

2.      食譜中的芡汁唔係一定要全部落, 自行調較.

宮保蝦球

原本以為煮呢個送會簡單d, 但又係要先將d蝦去炸.... 又浪費左d時間去炸及又要用好多油炸呀 !!!


宮保蝦球


材料 :
A) 中蝦  1斤       
B) 蒜茸   1茶匙   /  辣豆瓣醬  1茶匙  /  紅辣椒  1隻  (切粒)
C) 蔥粒  1湯匙

蝦醃料 :
1) 鹽  1/4茶匙  / 胡椒粉 少許
2) 雞蛋  1/3 隻 /  生粉 2 湯匙

調味料 :
鎮江香醋 1湯匙  /  茄汁 1湯匙  / 生抽 1茶匙  / 砂糖  2茶匙 
麻油 少許


做法 :
1.中蝦去殼, 剔腸及洗淨後切雙飛, 加入蝦醃料1)醃約15分鐘備用.
2.將巳醃好的蝦加入醃料2)拌勻後, 隨即放入大熱油內炸至熟, 撈起及用廚紙吸去油份.
3.燒熱油2湯匙, 將材料B) 順序加入炒香後, 將調味料加入煮滾後, 將巳炸熟的蝦仁回鑊, 猛火快炒及兜勻後上碟, 並灑上蔥粒即成.

金華醉香雞卷 (附食譜)

記起媽媽以前新年好鐘意將新鮮雞去搽d酒及鹽醃好後蒸熟放入雪櫃,

食時只要浸一浸熱水, 就隨時有酒香味的鹹雞食啦 ....

我就貪方便, 試下用雞扖改做這菜色, 變成一款簡單的宴客菜 !

食譜Download請按此

金華醉香雞卷

材料:
雞扖   2件

醃雞料 :
鹽 1+1/2茶匙、沙薑粉 1/4茶匙、花椒粉 1/4 茶匙、砂糖 1/2茶匙
紹興酒  1湯匙、薑汁 1茶匙、麻油 少許

浸雞水:  清水 3杯  / 魚露 1湯匙 / 紹興酒 1湯匙

八角 2粒 / 甘草 1片

做法 :
1.先將雞扖洗淨瀝乾水份, 將醃雞料拌勻後, 平均搽在雞皮及雞肉內, 然後將雞 扖慢慢捲起, 用錫紙包實, 放入雪櫃醃3-4小時 (或1晚)
2.燒熱浸雞水, 水滾起後改中火, 然後將雞肉卷連錫紙放入水內慢火浸約20分鐘至熟.
3.熱食可以放涼一會後切件, 或將雞件原條放入雪櫃冷藏, 食時蒸熱即可.

北菇棉花雞 (附食譜)

唔使去酒樓食 "雞札 "都可以做到入面那些餡料啦 .....

自己煮呢味送菜都一樣 !

 

北菇棉花雞    食譜Download

材料:
雞脾肉  2塊   //  巳浸發魚肚  2兩   // 冬菇  6隻 (浸軟)

調味料 : 生抽 1茶匙 / 糖 1/2茶匙  / 麻油 少許 / 薑汁酒 1茶匙

冬菇醃料 : 蠔油、糖、薑汁酒、胡椒粉 少許

芡汁 :
蠔油 1茶匙 /  上湯  1/4 杯  / 糖 1/2茶匙  / 鹽 1/4茶匙

粟粉  1茶匙

做法 :
1.雞脾肉去肥膏及皮, 略沖洗後, 抹乾,切成骨牌狀,加入調味料醃約30分鐘備用.
2.浸軟冬菇去蒂,洗淨切件, 加入醃料略蒸約5分鐘入味備用.
3.魚肚浸發後, 用薑蔥出水, 洗淨及揸乾水份, 切成骨牌狀備用.
4.將雞肉及冬菇各一件放上魚肚面, 排放上碟, 以大火蒸約7-8分鐘至熟, 淋上薄薄一層芡汁

2010 年 - 韋大少學煮餸 - (9) - 3 餸1 湯

今天要比平日(星期日)早少少要起床,因為有朋友中午要到我家學整餅。

所以,九點幾要起床準備材料及另外要準備埋韋老爺及大少、二少明天的早餐。

由於今日工人放假,所以韋太教完餅後都好忙要清理現場及又要準備晚餐。

 

不過,韋太一早巳安排左一些簡單菜色。昨天巳叫工人姐姐準備好材料及醃好啲肉。

今早還幫韋太煲埋湯先出街,所以,今餐韋大少都係刨左幾個薯仔,炆左煲薯仔排骨及煮左碟菜,個肉餅蒸蛋係韋太拂好蛋及預先蒸好左肉餅,放入去蒸時再講回給他知點做的。因為上次佢巳學過蒸蛋。

今餐又可以加料,因為個湯係豬肚排骨咸菜胡椒湯。

平時煲湯唔會食渣的。但豬肚係例外。洗豬肚係要多功夫,所以,工人姐姐昨天巳洗好,下次大把機會叫佢教大少洗,放暑假,日日都在家。

今晚菜色有:

蒜子上湯金銀蛋莧菜 (工人唔記得買鹹蛋,所以無落)

豬肉餅蒸水蛋 (第一次蒸水蛋加肉餅,但係之前韋太用左個微波爐的蒸焗功能,蒸完成碟都係油 ??),最後改回用明火去蒸水蛋,但係肉餅早巳叮乾,太難食,掉左肉餅)

薯仔炆排骨 - 好夠味及淋,韋太又撈汁食左成碗飯,又肥左幾磅 !)

豬肚蘸少少鼓油巳好好味。

 

 

 

2010 年 - 韋大少學煮餸 - (8) - 3 餸1 湯

剛過去的星期日,天氣十分之熱,座在家中唔開冷氣真係熱到想死 .....

每個星期日一早起身的第一件事唔係食早餐,而係走入廚房看看晚餐要做的準備功夫係整乜?

然後當然叫大少入來幫手做野啦 !

韋大少開始有啲唔耐煩,叫佢幫手準備晚餐他都會話識啦 ..之前學過啦,你做咪得囉 ..

韋太話識唔代表你識晒或熟練,都要做 !!!

我巳安排做一些簡單的菜色,所以要做的工作唔係多,都係重溫刨瓜皮、醃下肉,切下瓜等等。

大少連煮都唔想煮 .. 因為佢掛住睇書及廚房真係好熱呀 !!!

所以,今餐教完大少炆淋左南乳骨及煲好湯之後,碟菜都係韋太去炒的 !

不過,唔緊要,韋太自己都要比心機去學煮餸 ..

因為韋老爺都話韋太需要在這方面下一番功夫呀 !

 

 

 

2010 年 - 韋大少學煮餸 - (7) - 2 餸1 湯

這兩天的天氣真係熱死人.... 行出街一陣熱到流晒汗,所以,最好都係留在家中看下書。

近日韋太放工後回到家乜都唔想整 .. 只係想休息一下,再諗下做乜好 ?

不如就走入廚房煮下餸,再練習一下廚藝先啦 ..

韋太煮餸雖然唔叻,但係都會懂得一些基本功夫,都可以教到大少的。

今餐本來係想整冬茸牛肉羹,材料整好晒想煲的時候才發覺工人巳煲落湯 ?

所以,急忙致電給她問清楚 ... 原來係星期六的晚餐湯水,點知韋老爺要開夜班,我地無煮飯買左麥記包包食,工人姐姐諗住留返星期一先飲 ? 我話最討厭隔夜飯餸的。

不過,煲湯佢放入去真空煲內煲及返滾過,最後當然今晚飲左先啦 ...

而我個冬茸牛肉羹就留返佢明天煲啦 !

是日晚餐 :

花旗參圓肉瘦肉湯

鹵水拚盆

蜜豆菜花炒肥牛

 

 

 韋太少今次都係學撕蜜豆啲筋及如何去切開椰菜花。

 鹵水拚盆佢就無乜野做過,因為工人姐姐昨天巳將豬大腸用高速煲煲淋左,雞翼都出左水,個鹵水汁都係自家製作的,大少都只係將材料放入去,教佢浸幾耐就算。

原本今晚係三餸,工人無買到椰菜 ? 買錯左椰菜花 ?

所以,韋太就叫大少兩樣菜炒埋一齊,麻煩在先炒淋啲椰菜花才加入蜜豆去炒。

下一次又整乜好呢 ? 等我慢慢諗下先 !

2010 年 - 韋大少學煮餸 - (6) - 3 餸1 湯

今天係 7月1日回歸的假期,所以又安排韋大少入廚炒幾味 ..

但點知大少話今日一早要出街,所以,要準備的材料醃的工作全部要由工人姐姐幫佢做左先 ?

大少只係晚上入廚炒及炸的工作 ...

之前買左一包炸天婦羅粉,但係韋太都未試過用佢來炸物,唯有按照包裝袋上的指示去開粉漿,點知就出事... 太稀啦 .... 攪到點粉上唔到啲蝦到,後來韋大少話要加粉入去攪杰啲才算成功,但係都玩左一輪,蝦都炸到淋晒 ...

原本打算炸茄子,點知工人姐姐聽錯買左節瓜 ??? 那麼算吧,就只炸了一個蕃薯試啦。

其實今日大少要係學炸斑塊及蝦,炒菜係改為炒硬身啲的西蘭花及學做一個粟米茨汁。

明知煮炸物就要用湯水去換和一下,所以煲了"清補涼湯",簡單又易煲。

 

 

 

 

 

 韋太食後評語 :

 西蘭花太淋及味道淡太啲,粟米斑塊夠味,汁太多,不過大家愛多汁撈飯食,最後汁都食晒。

炸蝦淋晒,蕃薯ok. 湯當然無問題。

 

 

2010 年 - 韋大少學煮餸 - (5) - 3 餸1 湯

好容易又星期日,為左想快 d將韋太的手藝傳受給大少韋太就盡量利用假期去教下韋大少 !

但由於韋大少仍然在病態當中,加上身體過於疲勞,韋太都係主力做的一個,大少在旁聽著教導,因為他的右手受傷,怕影響傷口。

 

算啦 ! 難得佢都肯企入來廚房,就放過佢一馬啦 ... 但仍然要尊心聽韋太的教學。

今餐又要煮3 餸一湯,不過今次個湯就好簡單,係煲南瓜湯,用高速煲去煲十分鐘後就去街,回來用枝攪湯棒輕鬆攪2-3分鐘,就乜渣都無晒 ! 其實大少唔鐘意飲及食南瓜的,但係無湯渣的南瓜湯,佢話飲落都似蕃茄湯,都會接受得到,無之前那麼抗拒。

主菜選擇北菇蒸滑雞,不過今次就加入大頭菜、蔥段去蒸,惹味很多 ...

另外,家常少炒一定唔少得要學生炒排骨 .. 因為學識左之後就可以變化為炒咕嚕魚塊雞塊乜都得 . 呢些都係家中時常食到的菜色。

原本平時炒絲瓜都會加入木耳及雞柳,但係由於今餐主菜有蒸雞,所以就清清地齋炒絲瓜及木耳。 

 

 

   韋太食後評語 :

1. 個湯清清地又無渣又有營養,平日多煲都好。

2. 生炒骨味道剛好,但係汁就杰身左少少。

3. 蒸雞夠滑,冬菇吸晒啲汁,好夠味。

4. 絲瓜味道不太好,可能下次最好加少少肉去炒。

2010 年 - 韋大少學煮餸 - (4) - 碟頭飯

今天係星期六,原本韋二少話要去同學仔到玩。韋太諗住教大少整簡單啲,因為明天都要教韋大少煮飯。

所以,今天教整香茅豬扖雞翼飯。

早前韋太買左好多香料回來,其中一樣係香茅粉。

所以,今次就教大少用香茅粉去醃雞翼及豬扖。

點解唔係教一樣又要教埋整豬扖 ?

因為豬扖都係一般家庭菜色常見及用到的食材,順便教埋佢點處理及醃法,下次又可以一講就明啦 !

唔好以為只係碟頭飯會做少啲 ? 伴碟菜都要學炒架 ..

不過,今次伴碟菜係椰菜,用左西式方法教大少去炒,就係加入香草及黑椒碎,效果都唔差架。

在街外食香茅豬扖飯,韋太就最愛加多啲蔥油去撈飯食,

自家製,喜歡加幾多就整幾多啦 ... 整左一大碗到最後都係唔夠食,因為韋太加左好多在自己碟飯上面呀 !

 下次都試下整其他碟頭飯先 !

2010 年 -韋大少學煮餸 - (3) - 父親節 - 3 餸1 湯

今天係父親節,一早同大少講好左叫佢煮餐飯給韋老爺當係父親節的一種表示。

他非常之同意,因為佢可以慳番一份父親節禮物唔使去諗 ...

今天都係預備一些簡單快捷的餸菜,唔使炸的韋太又可以洗少啲。

今次主要教授炆冬菇及炆餸的技巧。炒蛋切蝦及醃蝦都講埋點去做 。

西芹如何去筋及做法及切雞柳的技巧。

可能大少都未能掌握到切雞柳大小件的分別,所以當餸煮好及食飯時,我會問佢覺得呢個賣相及食下去係咪太細粒唔係好好呢... 這樣,佢下次就會容易留心上次煮出來的效果點架啦 !

 

 

 

 

 

 

 韋太食後評語 :

 冬菇好淋身及排骨入晒味,原本打算開大火去收汁,但係由於韋太食飯喜愛撈汁,所以最後都無收少d汁,看下去水汪汪,但係最後食到一滴汁都無。

西芹加得太多水去煮,老火左有少少黃,雞柳今次大少醃時落輕手左,所以味道淡左啲。還有,西芹佢求其去切,有啲切到一粒粒,賣相唔好看呀 !

蝦仁炒蛋都算ok,不過下次要將蝦痴埋上蛋就最好。

菜湯方便快捷,不用多教。

* 下次又要諗下教乜好先 ! *