第一次用鎮江醋去煮雞翼, 因為之前唔知整乜就買左一枝鎮江醋回來,
為左唔好浪費呢枝好野, 見有食譜話用佢, 重唔那那聲去跟住試做啦 !
點知, 出書D人唔知係唔係"斷估" , 佢話一磅雞翼加1杯水去煮汁, 我巳經係買左兩磅雞翼煎香後才去煮, 點知趁煮就趁多水 (或者可能係兩磅雞翼出水更多), 所以到最後都要自己 (整色整水) 才有書中的顏色 .. (即呀蘇話整乜都要加D老抽去上色)
其實煮中菜同整蛋糕的原理係差唔多, 煮得多就唔使跟佢話加鹽加醋, 係要靠自己去試味的及要領略個中的所謂 "竅門 "就容易掌握啦 !
鎮江醋陳皮雞翼
調味料:
鎮江醋 2湯匙 砂糖 2 湯匙
喼汁 1湯匙 生抽 1 湯匙 鹽 少許
老抽 1湯匙 清水 1/4 或 1/2杯
乾蔥頭 2粒 (切片) 陳皮 1小角 (預先浸軟及刮乾淨瓤後切絲)
芡汁 : 粟粉 2茶匙 + 清水 1湯匙
做法:
1. 將雞翼解凍, 洗淨後瀝乾水份.
2. 燒熱鑊加入少許油, 將雞翼兩面煎香後盛起.
3. 另再燒熱鑊加入少許油, 將乾蔥片爆香後加入雞翼及調味料, 大火滾起一會後轉中細火將雞翼煮熟, 最後加入陳皮絲煮片刻, 用少計生粉水埋芡至適合的杰度, 上碟供食..
注:
1. 如汁太稀,可以加入少許生粉水去埋芡, 太杰可以加入少許 "熱水"去煮.
2. 食譜中的芡汁唔係一定要全部落, 自行調較.
沒有留言:
張貼留言