韋太近年都好少 POST 蛋糕食譜，比粉絲們投訴 Tim !!!
其實韋太手上都有好多巳製作好的食譜，但係要它先處理好及編寫食譜，真係要坐定定唔好兩頭檸，花一兩晚時間就可以做到。
但係韋太經常無事忙，好似返工一樣，原本安排只係做呢幾樣，但係中途突然又加多左工作量，真係唔知做邊樣先好 ?
不過，韋太自知太懶散，一定會再製作多些食譜與大家分享 !
心水清的粉絲，在網站內好少找到用香蕉做的食譜，原因係韋太及韋大少及二少們唔多like Banana，但之前韋老爺生日，原本打數做5個生日蛋糕，第5個生日蛋糕想做焦糖香蕉慕士蛋糕，但唔夠淡忌廉及太多蛋糕雪櫃都無位放啦 !
香蕉都由黃皮膚變成起晒斑點 .....熟晒。
韋太唔想浪費，就用左佢製作香蕉牛油蛋糕。其實工人姐姐都好鍾意香蕉蛋糕，佢話老爺都鐘意食，就做一個啦 !
焗左成50分鐘，剛剛好熟，入面唔會太濕或太乾，連韋老爺都開口話 [正]。
所以就與大家分享食譜及製作過程。
香蕉核桃牛油蛋糕
A) 無鹽牛油 100 克 室溫放軟
B) 砂糖 90 克
C) 熟蕉1隻 160 克 (分2份) (一半切粒或片)
D) 雞蛋 2隻 (打散)
E) 低筋粉 120克 + 發粉 2克
幼鹽 1 克
F) 巳烘脆核桃 適量
做法 :
1.將香蕉平均分2份，一份粒做餡料，加入一半砂糖用叉壓成茸。
2.將粉類混合過篩及將鹽加入。
3.將餘下一半砂糖加入牛油內用中速打約
4-5分鐘至乳白色。
4.將蛋漿分4-5次加入牛油糊內打勻至油脂完全混合。
5.將蕉茸加入及打勻。
6.將粉類加入拌勻，加入香蕉餡及將麵糊倒入模內，放上核桃。
7.放入巳預熱180度的焗爐中層，先焗20分鐘，然後將蛋糕取出，在中間用小刀界一刀，再放回入焗爐，繼續焗25-30分鐘。
韋太小貼士:
蛋糕焗約30分鐘後可以蓋上錫紙，防止表面太濃。
蛋糕要用竹籤插入測試，要完全沒有麵糊沾在竹籤上即熟透。
若想蛋糕中間爆口再靚啲，可以在中間唧入牛油溶液。
列印食譜 -->> 請按此
沒有留言:
張貼留言