Fissler 2012- 每週食譜介紹 (5) - 自製煄蹄

用左好多年高部煲，真係覺得無左佢好唔方便。原因係每餐飯都要靠晒佢，用佢來 [蒸] 飯，真係好過用西施電飯煲。保證唔痴底，唔會浪費米飯。而且又唔使放個電飯煲在廚房，空間位置多好多。

好多人問韋太成日用高速煲，乜唔怕佢會 [爆炸] ... 

若你問我，我會話唔怕，原因係我買的係有品牌及德國製做的高速煲。而唔係國產的，所以信心都唔同。

高速煲做燜煮菜色當然一流，因為可以在短時間內將肉燜霖之餘，還可以保持肉汁的鮮味。

傅統燜煮菜色，多數會加入大量水份預埋蒸發，但用高速煲去煮，當然只係加入少少水就可以燜煮到一味原汁原味的菜色。

詳細製作過程及食譜，請入內查看。

 

 

今次，韋太用手上一個 4.5 L 的細高速煲，剛剛好放入一大隻鮮豬蹄去燜。好快就燜霖左一大隻豬蹄，自家製作煄蹄，乾淨又衛生，仲好好味潻 !

無高部煲的朋友都可以試做呢個小食。只係烚豬蹄的時間要加長。(約 60-90分鐘)

材料:
新鮮豬元蹄     一隻     約 2斤

白鹵水汁藥材料:
香葉    2 片
八角    3 粒
花椒    1茶匙
甘草    2片
沙薑    6粒
草果    1 個

鹵水調味料 :
幼鹽    2湯匙
砂糖    1茶匙
雞粉    1茶匙
魚露    3湯匙
清水    1400 毫升
紹酒    1湯匙

 

做 法 :
1. 將清水煲滾，將豬元蹄及白鹵水料及調味加入。
2. 蓋上鍋蓋及高速鍋閥門調較為 2度，待綠色氣閥升起後，改用慢火繼續烹調20分鐘。
3. 待鹵水放涼後，將豬元蹄浸在鹵水中約8小時或浸過夜。
4. 將豬元蹄取出，起骨，然後包上3層保鮮紙扎，放入雪櫃冷藏5-6小時即成煄蹄。
5. 將煄蹄取出，解去保鮮紙，切片上碟，食時蘸蒜蓉醋，效果更美味。

蒜蓉醋材料:  
蒜蓉    2茶匙
幼鹽    1/8 茶匙
砂糖    1/2茶匙
米醋    2湯匙
飲用水  1湯匙
紅辣椒  切碎

做法: 將所有材料拌勻。